«Դուռը թակեցի, բացեց հորս կինը, ասացի՝ բարև ձեզ, ես ձեր ամուսնու առաջին կնոջ աղջիկն եմ, եկել եմ ձեր թույլտվությունը ստանամ հորս հետ ծանոթանալու համար:

Ռուզաննան, հրաշալի կին է, ասաց՝ «արի, լոգանք է ընդունում, հիմա դուրս կգա: Ոտքերս դողում էր: Ոչ մի բառով չեմ կարող նկարագրել դա ինչ է, որ դու 19 տարեկանում առաջին անգամ սպասում ես, որ լոգարանից դուրս է գալու մի մարդ, ում արյունը քո երակներով հոսում է: Ներսումդ հրաբուխ է:

Եկավ 2 ձեռքով 2 ոտքով հասարակ տղամարդ: Ոչինչ չէի զգում: Ես այդ պահին հասկացա, որ ինքը մայրիկիս շատ է սիրել: Միայն շատ սիրած ու կորցրած տղամարդը կարող էր հուզմունքից ու ներքին ապրումներից մեղադրեր կնոջը: Նա անընդհատ մեղադրում էր մորս չստացված հարաբերությունների ու բաժանման համար: Բայց ես ուրախանում էի, քանի որ հասկանում էի, որ սիրո պտուղ եմ»,- «Tete A Tete» հաղորդման շրջանակներում պատմել է դերասանուհի Լիա Զախարյանն, ում հայրը լքել է, երբ նա դեռ ծնված չէր: