Արցախցիները վրդովված են, վիրավորված ու հուսահատված. բռնի տեղահանումից հետո իրենց տեղավորել են Տավուշի մարզի Դիլիջանի գիշերօթիկ դպրոցի շենքում: Սկզբում բարերարներն են օգնել՝ սննդով ու այլ անհրաժեշտություններով: Շենքում գործել է ճաշարանը, աշխատել է նաև խոհարար, ով սնունդ է պատրաստել բռնի տեղահանված արցախցիների համար:
Ձմռան կեսին անջատել են գազն ու հոսանքը, որ շենքում պատսպարվելն անհնարին դառնա։
Արցախցիները չգիտեն՝ ինչ անել ու ուր գնալ. Սոցապ նախարարությունից եկել ու ասել են, որ շենքը պետք է ազատեն, քանի որ այդտեղ պետք է վերանորոգում սկսվի:
Ծայրահեղ պայմաններում ապրող արցախցիները, որոնց մի մասն անչափահաս երեխաներ ունի, կանգնել են օրվա հացի ու տանիքի խնդրի առջև: Ասում են՝ իրենց հանդեպ ակնհայտ վատ վերաբերմունք են տեսնում, ընդհուպ՝ պետական մակարդակով:
