Այսօր՝ սեպտեմբերի 2-ին, արտակարգ դեպք է տեղի ունեցել Երևանում։ Ժամը 14:30-ի սահմաններում ՀՀ Ներքին գործերի նախարարության Փրկարար ծառայության 911 ճգնաժամային կառավարման ազգային կենտրոն ահազանգ է ստացվել, որ Ամիրյան փողոցում ավտոմեքենայում պայթյուն է տեղի ունեցել։
Ժամանել են նաև ՀՀ ՆԳՆ ոստիկանության պարեկային ծառայության Երևան քաղաքի գնդի 3-րդ գումարտակի պարեկները՝ գնդի հրամանատար Անդրանիկ Իսախանյանի, գումարտակի հրամանատարի տեղակալ Կարեն Ավետիսյանի գլխավորությամբ։
Տեղում պարզվել է, որ պայթյունը տեղի է ունեցել Toyota մակնիշի ավտոմեքենայում, որն ամբողջությամբ վերածվել է մետաղե ջարդոնի, պայթյունի հետևանքով էլ վնասվել են մի քանի ավտոմեքենաներ, այդ թվում՝ Երևանի քաղաքապետարանի հաշվեկշռում հաշվառված ավտոբուսը։
Դեպքի վայր են ժամանել նաև Երևանի 103 շտապօգնության բժիշկների 2 հերթապահ խումբ։
Այս պահին դեպքի վայր ժամանած ՀՀ ՆԳՆ ոստիկանության համայնքային ոստիկանության գլխավոր վարչության Կենտրոնական բաժնի ծառայողները՝ բաժնի պետ Երվանդ Նիկոյանի գլխավորությամբ, պարզում են արդյոք պայթյունի հետևանքով տուժածներ կան, թե ոչ։
Դեպքի մասին ոստիկանության Կենտրոնական բաժնից տեղեկությունը փոխանցել են ՀՀ քննչական կոմիտեի Երևան քաղաքի քննչական վարչության Կենտրոն և Նորք Մարաշ վարչական շրջանների առաջին քննչական բաժին, որտեղից դեպքի վայր է ժամանում քննչական խումբը։
Դեպքի վայրում հավաքված քաղաքացիները նշում էին, որ պայթյունի հետևանքով մի քանի քաղաքացիներ տեղափոխվել են հիվանդանոցներ։
