Մինչ աշխարհը անհանգստությամբ հետևում է ԱՄՆ-ի և Իրանի միջև սրվող հակամարտությանը, միլիարդատերերը, կարծես, պատրաստ են ցանկացած հետևանքների՝ շնորհիվ իրենց գերժամանակակից բունկերների։
Նոր Զելանդիա. «Ապոկալիպսիս ապահովագրություն» գերհարուստների համար
Որոշ միլիարդատերերի համար Նոր Զելանդիան դարձել է ցանկալի վայր՝ հնարավոր «դատաստանի օրվան» պատրաստվելու համար։
LinkedIn-ի համահիմնադիր Ռեյդ Հոֆմանը 2017 թվականին The New Yorker-ին ասել է, որ Նոր Զելանդիայում անշարժ գույք գնելը վաղուց գերհարուստների շրջանում մի տեսակ կոդ է եղել՝ «ապոկալիպսիս ապահովագրություն»։
«Ասել, որ Նոր Զելանդիայում տուն եք գնում, նման է աչքով անելուն, այսինքն՝ ուրիշ բան բացատրելու կարիք չկա», – նշել է Հոֆմանը։
Vivos ստորգետնյա ապաստարանների ցանցը հայտարարեց, որ 2020 թվականին Նոր Զելանդիայի Հարավային կղզում տեղադրել է 300 մարդու համար նախատեսված բունկեր։
Մեկ այլ ընկերություն՝ Rising S Bunkers-ը, հայտնել է, որ վերջին մի քանի տարիների ընթացքում երկիր է մատակարարել մոտ 10 մասնավոր բունկեր։
Միլիարդատերերը, ինչպիսիք են Սեմ Մորգանը, Փիթեր Թիլը և Բիլ Ֆոլին, միլիոնավոր դոլարներ են ներդրել կանաչ կղզիների ընդարձակ կալվածքներում։
Ցուկերբերգի հավայան բունկերը՝ «ընդամենը նկուղ»
Facebook-ի հիմնադիր Մարկ Ցուկերբերգը բազմիցս հերքել է ապոկալիպսիսի նախապատրաստման մասին լուրերը՝ պնդելով, որ իր հավայան ռանչոյին կից բունկերն ընդամենը «նկուղ» է։
Wired-ի տվյալներով՝ գլխավոր համալիրը ներառում է երկու առանձնատուն և 5000 քառակուսի ոտնաչափ մակերեսով բունկեր, որը տներին միացված է ստորգետնյա թունելով։
People ամսագրի տվյալներով՝ այն պարունակում է մեխանիկական սարքավորումների համար նախատեսված տարածքներ, բնակելի տարածքներ, արտակարգ ելք և դուռ, որը հիշեցնում է ռմբապաստարաններում եղածները։ Հսկայական տարածքը և անվտանգության միջոցառումները վաղուց գրավել են հանրային ուշադրությունը։
«Կարծում եմ՝ չափազանցություն է մտածել, որ ռանչոն ինչ-որ աշխարհի վերջի բունկեր է։ Դա պարզապես ճիշտ չէ», – ասել է Ցուկերբերգը The Circut-ին տված հարցազրույցում։
Որտե՞ղ են թաքնվում միլիարդատերերը
Հավայան կղզիներից և Նոր Զելանդիայից բացի, ոմանք նախընտրում են մեկուսացված շոտլանդական լեռները կամ Խաղաղ օվկիանոսի կղզիները, որտեղ կարող են սպասել ցանկացած համաշխարհային աղետի։
Աշխարհի ամենահարուստների 1%-ը վաղուց ուսումնասիրում է նման «հարուստների համար ապաստարաններ»՝ հնարավոր համաշխարհային աղետի նախապատրաստությունը վերածելով կյանքի ապահովագրության էլիտար ձևի։
