Տանզանիայի հյուսիսային հեռավոր հատվածում երկու ավտոբուսների բախման և հրդեհի հետևանքով տասնյակ մարդիկ են զոհվել, հայտնում է Associated Press-ը։
Երկրի նախագահ Սամիա Սուլուհու Հասանը կիրակի օրը իր հայտարարության մեջ խորը վիշտ է հայտնել վթարի կապակցությամբ, որի հետևանքով զոհվել է առնվազն 37 մարդ, ևս 30-ը՝ վիրավորվել։
Բախումը տեղի է ունեցել շաբաթ երեկոյան Կիլիմանջարոյի տարածաշրջանի Սաբասաբա շրջանում՝ Մոշի-Տանգա մայրուղու վրա։ Զոհերի ինքնությունն ու ազգությունն այս պահին պարզված չեն։
Նախագահը կոչ է արել ավելի խստորեն պահպանել ճանապարհային անվտանգության կանոնները՝ հայտարարելով, որ նման ողբերգությունները շարունակում են ծանր անդրադառնալ տանզանական ընտանիքների կյանքի վրա։
Վերջին տարիներին Տանզանիայի կառավարությունը բազմիցս կոչեր է արել կրճատել ճանապարհներին մահացության դեպքերի թիվը, որոնք չեն դադարում՝ չնայած անվտանգության ապահովմանն ուղղված տարբեր արշավներին։
