Ֆրանսիայի նախագահ Էմանուել Մակրոնը Դուբլինում կայացած եվրոպական առաջնորդների հանդիպման ժամանակ անսպասելիորեն հայտնվել է անհարմար իրավիճակում։ Լուսանկարներից դատելով կարելի է ասել, որ Իսլանդիայի վարչապետ Քրիստրուն Ֆրոստադոուտիրին գրկելու նրա փորձն այնպես չի ավարտվել, ինչպես նա ակնկալում էր։
Կադրերում երևում է, թե ինչպես է Մակրոնը ժպտալով խոնարհվում դեպի Իսլանդիայի վարչապետը՝ ակնհայտ մտադրություն ունենալով գրկել նրան։ Սակայն Ֆրոստադոուտիրը, կարծես, չի շտապում պատասխանել այդ ժեստին. նա թեթևակի հետ է քաշվում՝ միևնույն ժամանակ ձեռքը պահելով Ֆրանսիայի նախագահի ուսին։
Հատկապես ուշագրավ է Իսլանդիայի կառավարության ղեկավարի հայացքը։ Անհարմար մտերմության պահին նա նայել է լուսանկարչի կողմը, որն էլ հասցրել է անմահացնել այդ տեսարանը։ Նրա դեմքի արտահայտությունը որոշակի շփոթմունքի կամ անհարմարության տպավորություն է թողնում։
Ինքը՝ Մակրոնը, ընդհակառակը, միանգամայն անկաշկանդ տեսք ուներ. նա շարունակում էր ժպտալ և ուղիղ զրուցակցի աչքերի մեջ նայել՝ խոնարհվելով նրա կողմը՝ ողջունելու համար։
Կադրերն արվել են նոյեմբերի 12-ին Դուբլինում, որտեղ ընթանում էր Եվրոպական քաղաքական համայնքի գագաթնաժողովը։ Լուսանկարներն արագորեն ուշադրություն են գրավել Ֆրանսիայի նախագահի ջերմ տրամադրվածության և նրա իսլանդացի գործընկերոջ՝ առերևույթ ավելի զուսպ արձագանքի հակադրության շնորհիվ։
Այդուհանդերձ, հայտնի չէ՝ արդյոք Ֆրոստադոուտիրը միտումնավոր է խուսափել գրկախառնությունից, թե այդ ժեստը պարզապես ողջույնի պահին ստացված պատահական դրվագ է եղել։ Թե՛ նա, թե՛ նրա ներկայացուցիչները հրապարակայնորեն չեն մեկնաբանել տեղի ունեցածը
NEWS.am STYLE
