Իտալական Ferrari ընկերության առաջին ամբողջովին էլեկտրական ավտոմեքենան՝ «Luce»-ն, արդեն սպառված է մինչև 2027 թվականը։  ԱՄՆ-ում ավտոմեքենայի մեկնարկային գինը կազմում է 560,8 հզ. դոլար, սակայն ո՛չ բարձր գինը, ո՛չ էլ դրա դիզայնի շուրջ ծագած քննադատությունները չեն խանգարել գնորդների հետաքրքրությանը։

«Luce-ի այն քանակը, որը նախատեսում ենք վաճառել հաջորդ տարի, արդեն ամբողջությամբ պատվիրված է»,- ասել է Ferrari-ի տնօրեն Բենեդետտո Վինյան։ Նրա խոսքով՝ այժմ պատվեր գրանցող հաճախորդները ավտոմեքենան ստանալու համար պետք է սպասեն մեկ տարի։ Ընկերությունը չի հայտնել, թե քանի ավտոմեքենա է նախատեսում վաճառել, ինչպես նաև չի ներկայացրել պատվերների աշխարհագրական բաշխվածությունը։

Տեխնիկական բնութագրերով Luce-ն հագեցած է չորս էլեկտրաշարժիչով՝ յուրաքանչյուր անիվի համար մեկական։ Դրանց ընդհանուր հզորությունը կազմում է 1035 ձիաուժ, իսկ պտտող մոմենտը՝ 730 ֆունտ-ֆուտ։ Ferrari-ի տվյալներով՝ ավտոմեքենան 0-ից 100 կմ/ժ արագության է հասնում 2.5 վայրկյանում։