Ճապոնական Toyota ավտոարտադրողը SEMA 2026 ցուցահանդեսի համար պատրաստել է Woodland շարքի հինգ կոնցեպտ-մեքենա՝ ցուցադրելով, թե ինչպես կարելի է տարբեր տեսակի ուժային համակարգերով ընտանեկան ավտոմեքենաներին ամենագնացի տեսք հաղորդել, գրել է Motor 1-ը։
Շարքում ընդգրկվել են RAV4-ի, Grand Highlander-ի, Sienna-ի, bZ-ի և Crown Signia-ի հիման վրա ստեղծված կոնցեպտները։ Բոլորը բավականաչափ բարձր են գետնից, ունեն ամենագնացի անվադողեր, անփայլ սև անվահեծեր, անիվների կամարների լայնացուցիչներ և տանիքին՝ բեռնափոխադրման համակարգեր։
Նախագծերի վրա աշխատել է CALTY Design Research-ի դիզայներական թիմը։ Բոլոր հինգ ավտոմեքենաները ներկված են Horizon Blue երանգով, որը ներշնչված է 1960-ականների Toyota-ի գունապնակով։ Որպես պատմական ուղենիշնե՝ ընկերությունը նշում է Stout, Crown և Corona մոդելները։ Երկգույն գունավորումը՝ հակադիր գույն ունեցող տանիքով և շարժիչի ծածկոցով, լրացուցիչ տարբերակում է կոնցեպտները սերիական մեքենաներից։
RAV4 Woodland Plug-in Hybrid Concept-ը և Sienna Woodland Concept-ը ցույց են տալիս, թե ինչպես է արտադրողն առաջարկում էլեկտրական ուժային համակարգերն ու ընտանեկան գործնականությունը համատեղել ավելի արտահայտիչ ամենագնացների ոճի հետ։ Առաջինը հիմնված է արտաքին աղբյուրից լիցքավորվող հիբրիդային քրոսովերի վրա, իսկ երկրորդը մինիվենը վերածում է ավտոմեքենայի, որն արտաքուստ պատրաստ է գրունտային ճանապարհներով երթևեկելուն և վրաններով ճանապարհորդություններին։
Էլեկտրական շարքը ներկայացնում է bZ Woodland Concept-ը։ Grand Highlander Woodland Concept-ը և Crown Signia Woodland Concept-ը նույն մոտեցումն են առաջարկում ավելի խոշոր ընտանեկան ավտոմեքենաների համար։ Հնգյակն ընդգրկում է թափքերի և ուժային համակարգերի տարբեր տեսակներ՝ արտաքին աղբյուրից լիցքավորվող և սովորական հիբրիդներից մինչև ամբողջությամբ էլեկտրական մոդել։
Միաժամանակ Toyota-ն ընդգծում է, որ կոնցեպտները ներկայացված տեսքով նախատեսված չեն սերիական արտադրության համար։ Դրանք փորձարարական նախագծեր են՝ այնպիսի դետալներով և աքսեսուարներով, որոնք ընկերությունը չի առաջարկում որպես ստանդարտ սարքավորում։ Որոշ փոփոխություններ կարող են ազդել ավտոմեքենաների անվտանգության և բնութագրերի վրա, հանգեցնել երաշխիքի կորստի կամ մեքենան դարձնել ընդհանուր օգտագործման ճանապարհներին շահագործման համար ոչ պիտանի։
SEMA 2026-ում Toyota-ն կներկայացնի նաև փորձարարական ավտոմեքենաների մեկ այլ շարք՝ Snowhunter-ը։ Դրանում ընդգրկվել են Tundra և Tacoma պիկապները, ինչպես նաև 4Runner, Land Cruiser և Sequoia ամենագնացները։ Այս մեքենաները նախատեսված են ձմեռային արկածների համար. դրանք ունեն բարձրացված կախոց, քողարկաներկ, լրացուցիչ լուսավորություն, բեռնափոխադրման համակարգեր, իսկ սովորական անիվների փոխարեն՝ ձյան վրայով տեղաշարժվելու համար նախատեսված թրթուրներ։ Համալրումը ներառում է նաև խցանումներից դուրս գալու սարքավորումներ, բեռնային համակարգեր և դահուկների ամրակներ։
Եվս մեկ արտասովոր նախագիծ է Crown Signia GT-S Concept-ը, որը ստեղծել է Toyota Motorsports Garage ստորաբաժանումը։ Ի տարբերություն բարձրացված Woodland-ների՝ այս հիբրիդային ունիվերսալը ցածրացված է գրեթե հինգ դյույմով (մոտ 13 սմ), համալրված է լայնացված անիվների կամարներով, HRE-ի 21-դյույմանոց անվահեծերով և Lexus RX 500h F Sport-ի արգելակային սուպորտներով։ Ուժային համակարգի արդիականացման մասին Toyota-ն չի հայտնել։
