Նոյեմբերի 27-ի կառավարության նիստում ՀՀ վարչապետ Նիկոլ Փաշինյանը ներկայացրել է Հանրապետության տնտեսական ակտիվության ցուցանիշները։

Վարչապետը Հայաստանի տնտեսական քաղաքականության ռազմավարության մեջ կարևորել է ենթակառուցվածքների դերը և ընդգծել. «Երբ այսօր քննարկումներ են գնում Հայաստանի տնտեսական ակտիվության պատճառների և բացատրությունների մասին, կարծում եմ՝ դրանում որոշակի և էական դեր ունի այն, որ վերջին տարիներին մենք Հայաստանի Հանրապետությունում ենթակառուցվածքների վիճակի շատ էական փոփոխությունների ենք հասել»։

Վարչապետը արձանագրել է, որ հոկտեմբեր ամսվա տվյալներով Հայաստանի Հանրապետությունում աշխատավարձով ապահովված աշխատատեղերի նոր պատմական ռեկորդ է գրանցվել. «2025 թվականի հոկտեմբերին ունենք արդեն 810 074 աշխատատեղ, որը նախորդ ամսվա համեմատ ավելի քան 5000-ով ավել է կամ շուրջ 5000-ով ավել է։ Բայց ես համեմատությունները բերում եմ նաև այս անգամ էլ՝ համեմատելով 2018 թվականի հոկտեմբերին աշխատատեղերը ավելացել են 223 895-ով, իսկ աշխատավարձի ֆոնդը՝ ընդհանուր համախառն աշխատավարձի ֆոնդը, ավելացել է 149 միլիարդ դրամով։ Միջին աշխատավարձը, որը հոկտեմբերին կազմել է 313 000 դրամ, ավելացել է 135 000 դրամով»։

Վարչապետը նշել է նաև. «Նախորդ տարվա հոկտեմբերի նկատմամբ ունեցել ենք տնտեսական ակտիվության ցուցանիշի 11% աճ, իսկ արդեն 2025 թվականի առաջին 10 ամիսները նախորդ տարվա հունվար–հոկտեմբերի համեմատ տնտեսական ակտիվության ցուցանիշը կազմել է 8.1%»։