Ազգային անվտանգության ծառայությունը քիչ առաջ տեղեկացրել էր, որ Սյունիքի մարզի երկու անչափահաս բնակիչներ մոլորվել են և հայտնվել Ադրբեջանի տարածքում:
ԱԱԾ-ն հայտնել էր նաև, որ ստացված տվյալների համաձայն՝ ՀՀ Սյունիքի մարզի Տեղ համայնքի բնակիչներ Կարեն Արմենի Ջհանգիրյանը (ծնված 27.06.2007թ.) և Անդրեյ Արմենի Գյագունցը (ծնված 13.01.2008թ.) 2025 թվականի հունիսի 6-ին՝ ժամը 01:20-ի սահմաններում, Սյունիքի մարզի Արավուս գյուղի հարակից հատվածում՝ տեղանքում մոլորվելու հետևանքով հայտնվել են Ադրբեջանի տարածքում։ Ձեռնարկվում են անհրաժեշտ բոլոր միջոցները՝ քաղաքացիների գտնվելու վայրը պարզելու և նրանց անվտանգ վերադարձն ապահովելու ուղղությամբ։
Բնակիչները պատմեցին, որ կեսգիշերն անց ժամը 00։00-ից 01։00-ի հատվածում տղաները ձիերը նստել են՝ հանդից անասուններին բերելու նպատակով և արդյունքում մոլորվել են։ Արոտավայրերից ադրբեջանական դիրքերը մետրերի հեռավորության վրա են, այդ պատճառով էլ տղաները մոլորվել են և հայտնվել Ադրբեջանի տարածքում։ Այժմ նրանց գտնվելու վայրն անհայտ է։
