UFC-ի փառքի սրահի անդամ Չեյլ Սոնենն անդրադարձել է թեթև քաշային կարգի դասակարգման առաջատար Արման Ծառուկյանի շուրջ ստեղծված իրավիճակին և կոչ արել վերանայել վերաբերմունքը հայ մարզիկի նկատմամբ։

Չնայած Ծառուկյանը իր քաշային կարգի առաջին համարն է, հունվարին նախատեսված ժամանակավոր չեմպիոնական գոտու համար մենամարտելու հնարավորություն են ստացել Ջասթին Գեյջին և Փեդի Փիմբլեթը։ Մասնագիտական շրջանակներում կարծիք կա, որ UFC-ի ղեկավարությունն այդկերպ պատժում է Ծառուկյանին 2025 թվականի սկզբին Իսլամ Մախաչևի դեմ նախատեսված տիտղոսային մենամարտին չներկայանալու համար։

«Մի՞թե ժամանակը չէ ներել Ծառուկյանին։ Նա կարծես հայտնվել է ինչ-որ տարօրինակ «քավարանում»։ Բոլորը մոռացե՞լ են, որ նա եղել է պահեստային մարտիկ և տիտղոսային մենամարտի չեղարկումից հետո էլ ապահովել է անհրաժեշտ քաշը։ Նա կատարել է հանձնաժողովի բոլոր պահանջները, և դա պետք է ինչ-որ բան նշանակի։ Ես ցանկանում եմ, որ Արման Ծառուկյանին մատուցեն իր արժանին։ Անձամբ ես ներում եմ Ծառուկյանին և ուզում եմ, որ մյուսներն էլ հետևեն իմ օրինակին»,-նշել է Սոնենը։

Հիշեցնենք, որ Փեդի Փիմբլեթը և Ջասթին Գեյջին կմենամարտեն UFC-ի թեթև քաշային կարգի ժամանակավոր գոտու համար UFC 324-ում։ Մենամարտը կկայանա ԱՄՆ-ի Լաս Վեգաս քաղաքում՝ հունվարի 25-ին։