Իրավական ակտերի նախագծերի հրապարակման e-draft.am կայքում հանրային քննարկման դրված «Անձի կյանքի կամ առողջության համար վտանգ պարունակող զբոսաշրջային ծառայությունների մատուցման որակական և տեխնիկական չափորոշիչները սահմանելու մասին» ՀՀ կառավարության որոշման նախագիծը: Նախագծով սահմանվում է, որ նոր որոշումը ուժի մեջ կմտնի պաշտոնական հրապարակմանը հաջորդող տասներորդ օրվանից:
Ղեկավարվելով «Զբոսաշրջության մասին» ՀՀ օրենքի 4-րդ հոդվածի 1-ին մասի 3-րդ կետով, Հայաստանի Հանրապետության կառավարությունը որոշում է․
- Սահմանել անձի կյանքի կամ առողջության համար վտանգ պարունակող զբոսաշրջային ծառայությունների մատուցման որակական և տեխնիկական չափորոշիչները՝ համաձայն N 1 հավելվածի։
Հավելվածի հիմնական դրույթները
- Սահմանվում են էքստրեմալ զբոսաշրջային ծառայությունների (անձի կյանքի կամ առողջության համար վտանգ պարունակող ծառայություններ) տեսակը, կազմակերպիչների, ղեկավարների, անձնակազմի և մասնակիցների պարտավորությունները։
- Չափորոշիչները ընդգրկում են անվտանգության կառավարման համակարգի (ԱԿՀ) ներդրման, ռիսկերի գնահատման, ռիսկերի կառավարման, էական միջադեպերի արձանագրման, անձնակազմի պատրաստվածության և վերապատրաստման, անվտանգության սարքավորումների ստուգման ու պահպանման պահանջները։
- Կազմակերպիչը պարտավոր է ապահովել մասնակիցների համար ապահովագրություն (մեկ անձի դեպքում առնվազն 1,800,000 ՀՀ դրամ, մեկ ապահովագրական պատահարի դեպքում՝ առնվազն 18,000,000 ՀՀ դրամ), ինչպես նաև ապահովագրություն էական միջադեպերի ժամանակ բժշկական օգնության և տարհանման համար։
- Կազմակերպիչն ու ղեկավարները պարտավոր են կանխել ծառայությունից օգտվելն այն անձանց համար, ովքեր ալկոհոլի կամ հոգեմետ նյութերի ազդեցության տակ են, չունեն անհրաժեշտ հմտություններ կամ առողջական հակացուցումներ։
- Կրիտիկական սարքավորումները պետք է ստուգվեն ամեն օգտագործումից առաջ, օգտագործվեն և պահպանվեն արտադրողի ցուցումներին խիստ համապատասխան։
- Անհրաժեշտ է պահպանել փաստաթղթավորում՝ ԱԿՀ, անձնակազմի վերապատրաստման ապացույցներ, սարքավորումների ստուգման փաստաթղթեր, մասնակիցների ծանուցումների ստորագրություններ։
Ու՞մ կողմից է մշակվել նախագիծը
Նախագիծը մշակվել է ՀՀ էկոնոմիկայի նախարարության զբոսաշրջության կոմիտեի կողմից միջազգային գործընկերների հետ համագործակցությամբ։
Իրավական ակտի ընդունման անհրաժեշտությունը
Նախագիծը մշակվել է՝ հիմք ընդունելով ՀՀ վարչապետի 2025 թվականի հուլիսի 27-ի № 664-Ա որոշմամբ հաստատված հավելվածի պահանջները՝ արկածային զբոսաշրջության ոլորտում ծառայությունների մատուցումը իրավաչափ, անվտանգ և համակարգված կազմակերպելու նպատակով։
Ֆինանսական ազդեցությունը
Նախագծի ընդունումը պետական բյուջեից հավելյալ ֆինանսական միջոցների հատկացում չի պահանջում
Ակնկալվող արդյունքը․
- Կիրականացվի ծառայությունների մատուցման տեխնիկական անվտանգության և որակի միասնական պահանջների ներդրում։
- Կբարձրանա արկածային զբոսաշրջության ենթակառուցվածքների և ծառայությունների մատուցողների պատասխանատվության մակարդակը։
- Կապահովվի ոլորտում գործող մասնագետների և ուղեկցողների մասնագիտական պատրաստվածությունը՝ միջազգային լավագույն փորձին համապատասխան։
- Կխթանվի անվտանգության մշակույթի ձևավորումը և վերահսկողության մեխանիզմների կատարելագործումը։
- Կբարձրանա զբոսաշրջային ծառայությունների նկատմամբ հանրային և միջազգային վստահությունը։
- Հայաստանը կդառնա առավել գրավիչ, անվտանգ և մրցունակ ուղղություն արկածային զբոսաշրջության միջազգային շուկայում։
Կապը ռազմավարական փաստաթղթերի հետ.
Նախագիծը բխում է՝
- «Հայաստանի վերափոխման ռազմավարություն 2050»-ի 16-րդ «Ճանաչված, հարգված և հյուրընկալ Հայաստան» մեգանպատակից,
- Հայաստանի Հանրապետության կառավարության 2021–2026 թվականների ծրագրի համապատասխան կետերից և «Զբոսաշրջություն» բաժնից,
- ՀՀ կառավարության 2021թ. նոյեմբերի 18-ի N 1902-Լ որոշմամբ հաստատված միջոցառումների ծրագրից։
