Քիչ առաջ Բագրատ Սրբազանը հայտարարեց, որ հանրահավաքի մասնակիցների հետ երթով շարժվում է դեպի Հանրային հեռուստաընկերություն։ Մինչ այդ Սրբազանը պահանջել էր իրեն ուղիղ եթեր տրամադրել։
Սրբազանի հայտարարության մասին ԱԺ նախագահ Ալեն Սիմոնյանը քիչ առաջ գրառում է կատարել՝ նշելով․
«Ուղիղ եթերի ժամանակ ասել, որ գնում ես Հանրային հեռուստաընկերություն ուղիղ եթեր ստանալու համար և ուղիղ եթերի ներքո բարձրանալ դեպի նոր ուղիղ եթեր: Անհավանական»։
Բագրատ Սրբազանի պահանջին արձագանքել է նաև հեռուստահաղորդավար Պետրոս Ղազարյանը։
«Նոր իմացա, որ Սրբազանը գալիս է Հանրային՝ ուղիղ եթերի պահանջով։ Երևի վերջինս տեղյակ չէ, որ շարժման առաջին օրվանից մենք նրա համակիրներին և համախոհներին գրեթե ամեն օր եթեր ենք հրավիրել։ Ցավոք, զգալի մասը մերժել են։ Իսկ նրանք, ովքեր համաձայնել են, եղել են Հանրայինի եթերում՝ առանց մի բառ կրճատելու։ Հիմա էլ եթերը բաց է»,- գրել է Ղազարյանը։
Նշենք, որ Հ1-ից հայտարարություն էին տարածել, թե պատրաստ են հարցազրույցի ձևաչափով հյուրընկալել Բագրատ Սրբազանին։
Արձագանքելով Հ1-ի այս հայտարարությանը՝ Սրբազան պայքարն առաջնորդող Բագրատ արքեպիսկոպոս Գալստանյանն ասաց․
«Հարցազրույցների ժամանակն անցել է, մեր պահանջը ուղիղ եթերում ուղերձն է»։