Իսպանիայի արքայական ֆուտբոլի ֆեդերացիան հայտարարել է երկրի Գավաթի խաղարկության՝ այսօր նախատեսված բոլոր հանդիպումները հետաձգելու մասին։ Պատճառը Տոլեդո նահանգում տեղի ունեցած ողբերգական երկաթուղային վթարն է։

Հոկտեմբերի 28-ի առավոտյան Լոս Եբենես և Ուրդա համայնքների միջև ընկած երկաթուղային հատվածում բախվել են երկու արագընթաց գնացքներ, ինչի հետևանքով դրանցից մեկի երկու վագոնները դուրս են եկել ռելսերից։ Վերջին տվյալներով՝ ողբերգության զոհ է դարձել 50 մարդ, ևս առնվազն 179-ը ստացել են տարբեր աստիճանի վնասվածքներ։ Ընդհանուր առմամբ, վթարի ենթարկված գնացքներում եղել է 544 ուղևոր։

Սարսափելի դեպքի առնչությամբ Իսպանիայի ֆուտբոլի ֆեդերացիան հանդես է եկել պաշտոնական հայտարարությամբ.

«Ի նշան չորեքշաբթի վաղ առավոտյան Տոլեդո նահանգում տեղի ունեցած երկաթուղային վթարի զոհերի հիշատակի հանդեպ հարգանքի և համերաշխության՝ RFEF-ը հետաձգել է Իսպանիայի գավաթի խաղարկության առաջին փուլի բոլոր 24 հանդիպումները, որոնք պետք է կայանային այսօր ցերեկը և երեկոյան։ Առաջիկա օրերին ֆեդերացիան կհրապարակի մրցաշարի վերանայված ժամանակացույցը և հետաձգված խաղերի անցկացման նոր ժամկետները։

Իսպանական ֆուտբոլային ընտանիքը միասնական է իր վշտի մեջ և պատրաստակամություն է հայտնում աջակցել իշխանություններին՝ այս սարսափելի վթարի տուժածներին օգնություն ցուցաբերելու հարցում», — նշված է կառույցի տարածած հաղորդագրության մեջ։