ՀՀ վարչապետ Նիկոլ Փաշինյանի խոսնակը` Նազելի Բաղդասարյանը հերքել է մամուլում տարածված տեղեկությունը, թե Փաշինյանի ավտոշարասյունը ավտովթարի է ենթարկվել։
Ավելի վաղ «Հրապարակը» գրել էր, որ Նիկոլ Փաշինյանի ավտոշարասյունը այսօր Սյունիքից վերադառնալիս Արմաշ գյուղում ավտովթարի է ենթարկվել, վնասվածքներ են ստացել թիկնապահներից ոմանք։
Թերթի տեղեկություններով՝ Փաշինյանի ավտոշարասյունը նաև վթարի է ենթարկել քաղաքացի Շահնազարյան Յուրիկին։ Վերջինիս շտապօգնության մեքենայով տեղափոխել են հիվանդանոց։
Ավելի ուշ ՆԳՆ մամուլի խոսնակ Նարեկ Սարգսյանը իր սոցցանցում ևս հերքեց տեղեկությունը` դեպքի մասին մանրամասներ ներկայացնելով։
Ըստ հաղորդագրության` Արարատի մարզի Արմաշ գյուղում «Հյունդայի» մակնիշի ավտոմեքենայի վարորդը, չկարողանալով կառավարել այն, բախվել է պարեկային ծառայության կարգախմբի կայանված ավտոմեքենային։
«Պատահարի հետևանքով երեք մարդ, այդ թվում` պարեկային ծառայության կարգախմբի կին ծառայողը ստացել են մարմնական վնասվածքներ ու հոսպիտալացվել։ Հանգամանքները նախաքննությամբ պարզվում են»,–գրել է նա։
Սարգսյանը ևս նշել է, որ մամուլում տարածված տեղեկություններտը, թե նշված վթարի մասնակից է նաև ՀՀ վարչապետին ուղեկցող ավտոշարասյունը, չի համապատասխանում իրականությանը։
