tech.news.am-ը գրում է. Խարդախներն սկսել են ակտիվորեն օգտագործել Telegram Stars նոր արժույթը՝ արժեքավոր տվյալներ գողանալու համար։ Այս մասին հայտնում է «Իզվեստիա» թերթի կայքը։
Ըստ InfoWatch Group-ի առաջատար վերլուծաբան Էլիքս Սմիրնովի՝ Telegram-ը դարձել է կրիպտոարժույթի օգտագործման ամենահասանելի տարբերակներից մեկը, ուստի կան մարդիկ, որոնք ցանկանում են գումար աշխատել դրանով։
«Կրիպտոն դարձել է վճարման տարածված միջոց՝ հատկապես հաշվի առնելով արտասահմանում դրամական փոխանցումների և գնումների սահմանափակումները։ Ոչ բոլոր օգտատերերն են պատրաստ ստեղծել առանձին դրամապանակներ և նրանց համար ստեղծել պատահական գաղտնաբառեր, իսկ դրամապանակը Telegram-ի հաշվին կցելու պարզ տարբերակը դարձել է ամենահասանելի տարբերակներից մեկը։ Միանգամայն տրամաբանական է, որ կան մարդիկ, որոնք ցանկանում են գումար վաստակել դրանից»,- ասել է Էլիքս Սմիրնովը։
BI.ZONE Brand Protecton-ի փորձագետ Դմիտրի Կիրյուշինն իր հերթին ասել է, որ խաբեբաների հիմնական շարժառիթը օգտատիրոջ ցանկությունն է՝ գումար վաստակել և ստանալ գերբարձր եկամուտ։ Նրա կանխատեսմամբ՝ Stars-ի հետ կապված խարդախ ռեսուրսների թիվը մոտ ապագայում արագորեն կաճի, իսկ պատճառը Telegram-ի լսարանի մշտական աճն է, ինչպես նաև կրիպտոարժույթի նկատմամբ օգտատերերի հետաքրքրության աճը։
Նրա խոսքով՝ միայն 2024-ի առաջին կիսամյակում ընկերության մասնագետները գրանցել են մոտ 12,000 ֆիշինգային ռեսուրս։ Հարձակվողները նաև հաճախ օգտագործում են կրիպտոարժույթների թեման՝ ֆիշինգային խարդախությունները թաքցնելու համար: Արագ գումար և շահավետ ներդրումներ առաջարկելը խաբեբաների սիրելի հնարքներից է, հավելել է նա։
Ըստ «Կասպերսկի լաբորատորիա»-ի բովանդակության ավագ վերլուծաբան Օլգա Սվիստունովայի՝ խաբեբաներից պաշտպանվելու համար պետք է քննադատաբար վերաբերվել համացանցում հանդիպած ցանկացած տեղեկության, հատկապես, եթե դա վերաբերում է ֆինանսական գործարքներին:
Մասնագետը խորհուրդ է տալիս տեղադրել հուսալի անվտանգության համակարգ, որը կզգուշացնի ֆիշինգային և խարդախ ռեսուրսներ այցելելու ժամանակ։ Նաև պետք է օգտագործել երկգործոն նույնականացում և ոչ մեկի չտրամադրել մեկանգամյա թույլտվության կոդերը, ոչ միայն Telegram-ում, այլ նաև այլ հավելվածներում։