Ստանիսլավսկու անվան ռուսական թատրոնի տնօրեն Սուրեն Շահվերդյանի հասցեին սպառնալիքներ հնչեցնող քաղաքացին դերասան Վահագն Սիմոնյանն է՝ «Պոնչոն»։
Նշենք, որ Վահագն Սիմոնյանը դեռևս մեկ շաբաթ առաջ ֆեյսբուքյան իր էջում Սուրեն Շահվերդյանին մեղադրել էր իր անչափահաս երեխաներին «սև ճանապարհով առևանգելու» և Եվրոպա տեղափոխելու մեջ։
«Սա իմ վերջին նախազգուշացումն է քեզ, մեկ օր ժամանակ, երեխաներիս դնում եք օդանավ, առանց մազը ծռվելու ուղարկում եք հետ՝ Երևան, այլապես ես կբարկանամ։ Ես ջղայն ձյաձյա չեմ, բայց որ ջղայնացա՝ Աստված հեռու պահի»,-նշել էր Պոնչոն։
Սուրեն Շահվերդյանը նշեց, որ այս պատմության հետ առնչություն ունի այնքանով, որ իր ընկերոջ կինը Վահագն Սիմոնյանի նախկին կին է եղել։ «Նրանք հիմա միասին երեխա ունեն և երջանիկ ապրում են Եվրոպայում։ Եթե տեղյակ եք՝ իր երեխաները նույնիսկ հայտարարել են, որ հրաժարվում են իրենց հորից։ Հիմա չգիտեմ, թե ինչու է ինձ մեղադրում, ես ոչ մի բանի հետ կապ չունեմ, չեմ տեսել իր երեխաներին արդեն 15 տարի»,-ասաց Շահվերդյանը։
Ստանիսլավսկու անվան ռուսական թատրոնի տնօրենն ասաց, որ Վահագն Սիմոնյանն իրեն զրպարտում է և սպառնալիքներ հնչեցնում։ «Ես էլ դիմել եմ ոստիկանություն, գործին ընթացք տալու, ինքն էլ պետք է ներողություն խնդրի ինձանից։ Եթե նկատել եք՝ նա իր ադեկվատությունը կորցրել է, բայց չեմ ուզում, որ իմ անունը շահարկի և զրպարտի»,-ասաց նա։
Նշենք, որ այսօր տեղեկություն էր տարածվել, որ Ստանիսլավսկու անվան ռուսական թատրոնի տնօրենը դիմել է ոստիկանություն և հայտնել, որ իր հասցեին սպառնալիքներ են հնչեցնում։
