Երեկ Երևանում՝ Դրոյի 28 շենքի բակում էին հավաքվել Արցախյան առաջին, Ապրիլյան քառօրյա և Արցախյան 44-օրյա պատերազմներում զոհված հերոսների հարազատներ, ընկերներ, Արցախյան բոլոր պատերազմներին մասնակցած զինվորներ, հյուրեր ոչ միայն Երևանից, այլև՝ մարզերից, ովքեր մասնակցել են 44-օրյա պատերազմում զոհված Ժորա Մարտիրոսյանի հիշատակը հավերժացնող հուշաքար-ցայտաղբյուրի բացման արարողությանը:
Ինչպես հայտնում է ֆոտոլրագրող Գագիկ Շամշյանը, ներկա են եղել նաև Պաշտպանության նախարարության ներկայացուցիչներ, ինչպես նաև՝ ՊՆ պատվոպահակայիններ:
Հուշաքարի վրայից սպիտակ սավանը իջեցրել է հերոսի մայրը՝ Գայանե Հակոբյանը, որից հետո այն օծվել է հոգևոր հովիվի ձեռքով։ Հերոսի մասին խոսել է նրա ուսուցչուհին, ինչպես նաև՝ հերոսածին մայրերը:
