«Կային հոգևորականներ, որոնք գոհ էին քննչական մարմինների հարգալից վերաբերմունքից, բայց կային նաև հոգևորականներ, որոնք կրկին դժգոհում էին քննչական մարմինների վերաբերմունքից այն իմաստով, որ ոչ պատշաճ են իրենց դրսևորել քննչական մարմնում։ Կան հոգևորականներ, որոնք ասում են, որ իրենց բնակարաններում իրականացվող խուզարկությունների շրջանակում եղել են նաև հակառակ դեպքեր, որ բավականին հարգալից մոտեցում է եղել»,- Aravot.am-ի փաստմանը՝ լրագրողների հետ զրույցում Բյուրականի Սուրբ Հովհաննես եկեղեցու հոգևոր հովիվ Տեր Վրթանես քահանա Բաղալյանը նշել էր, որ կալանավայրում գտնվող հոգևորականների հետ շատ վատ են վարվում և հարցին՝ կարո՞ղ եք պարզաբանել՝ Դուք ի՞նչ տեղեկություններ ունեք, այսպես պատասխանեց Արագածոտնի թեմի մի շարք քահանաների փաստաբան Արմինե Ֆանյանը։
Նա վստահեցրեց՝ քահանաների իրավունքների խախտման մասով աշխատանք է տարվել․ «Բողոքարկվել են այդ գործողությունները համապատասխանաբար գլխավոր դատախազին, բայց նա փոխարենը վերադասության կարգով՝ հանձնարարի հսկող դատախազին քննության առարկա դարձնել այդ տեսակ խախտումները՝ մասնավորապես պաշտպանության իրավունքը, իրավական օգնություն ստանալու իրավունքից զրկելը, վատ վերաբերմունքը որոշ քահանաների մասով, և ընդհանրապես այն բոլոր խախտումները, որոնք թույլ են տրվել, մակագրել է այդ բողոքը նույն քննչական խմբի ղեկավարին։ Նա էլ մեկ նախադասությամբ գրել է, որ քահանաների հայտնած տեղեկությունները ստահոդ են։ Այդ որոշումը կրկին բողոքարկվել է։
Արմինե Ֆանյանը նաև հայտնեց, որ քննչական խմբի ղեկավար Նազելի Սարգսյանն, իր բնորոշմամբ, լրիվ ապօրինի որոշում է կայացրել իրենց՝ փաստաբաններին, այդ վարույթից հեռացնելու մասին․ «Պատճառաբանել է, որ քահանաների շահերի մեջ հակասություն կա։ Ակնհայտ կեղծ տեղեկություն է զետեղել իր որոշման մեջ, մինչդեռ քահանաների միջև որևէ հակասություն առկա չէ։ Այդ որոշումը ևս բողոքարկվել է։ Մենք շարունակում ենք մեր պարտականությունները կատարել»։
