Վարչապետ Նիկոլ Փաշինյանն ու իր տիկին Աննա Հակոբյանը պետական բյուջեի հաշվին անցկացնում են «Կրթվելը նորաձև է» արշավ, որն ավելի շատ հիշեցնում է նախընտրական մոբիլիզացիա։ Այսպես, այդ արշավի ժամանակ Փաշինյանն ու յուր տիկինը ներկայացնում են, թե ինչ է «իրական Հայաստանը», ինչպես հնարավոր չէր խուսափել Արցախի կորստից, ինչպես Հայաստանն ավելի «ինքնիշխան» դարձավ Արցախի կորստի հետևանքով և այլն։ Վերջին հանդիպումը տեղի ունեցավ Գորիսում, որտեղից էլ 24News-ին ուշագրավ մանրամասներ են հայտնի դարձել։

Եվ այսպես, մեր ունեցած տեղեկությունների համաձայն, բոլոր այն անձինք, որոնք մասնակցել են այդ հանդիպմանը, նախօրոք զգուշացվել են չվերցրել հեռախոսներ։ Կազմակերպիչները հայտնել են, որ ոչ մի ձայնագրություն Փաշինյանի և յուր տիկնոջ դասախոսությունից չպետք է լինի։ Հին և բարի ժամանակների պես, «կրթվելուն» մասնակցել են դպրոցների և մանկապարտեզների, մարզպետարանի աշխատակիցները, ինչպես նաև տեղի ՔՊ ակտիվը, որտեղ ակտիվ դերակատարություն է ունեցել ՔՊ-ական պատգամավոր, ՃՈ նախկին աշխատակից Արմեն Խաչատրյանի քույրը՝  Գորիսի մանկապարտեզներից մեկի տնօրեն Ժասմենա Խաչատրյանը։

Պետական համակարգի աշխատակիցներին ակնարկել են, որ եթե չմասնակցեն այս հանդիպմանը, ապա առաջիկայում «տեսականորեն» կարող են խնդիրներ ունենալ։ Մենք նաև շուտով անվանական կներկայացնենք հանդիպման մասնակիցներին։